BJP 11 List :
लोकसभा निवडणुकीचा पहिला टप्पा 19 एप्रिल रोजी होणार असून, मतदानाला आता फक्त 8 दिवस उरले आहेत. भारतीय जनता पक्षाने (भाजप) नुकतीच उमेदवारांची 11वी यादी जाहीर केली आहे. या यादीत उत्तर प्रदेशातील केवळ एका उमेदवाराचा समावेश असून, महाराष्ट्रातील जागांबाबतचे सस्पेंस अजूनही कायम आहे.
या ताज्या घोषणेमध्ये डॉ. विनोद कुमार बिंद यांनी उत्तर प्रदेशातील भदोही लोकसभा मतदारसंघासाठी भाजपचे तिकीट मिळवले आहे. या घोषणेसह भाजपने आता उत्तर प्रदेशातील 71 जागांसाठी उमेदवार जाहीर केले आहेत.
तथापि, कैसरगंज, रायबरेली, देवरिया आणि फिरोजाबाद यासारखे अनेक महत्त्वाचे मतदारसंघ अद्याप उमेदवारांच्या घोषणेच्या प्रतीक्षेत आहेत. कैसरगंजसाठी विद्यमान खासदार ब्रिजभूषण शरण सिंह यांच्या तिकीटाचे नूतनीकरण होणार नसल्याची शक्यता वर्तवली जात आहे. काल, भाजपने आपली 10वी यादी जाहीर केली, ज्यात पश्चिम बंगाल आणि चंदीगडमधील प्रत्येकी एकासह उत्तर प्रदेशातील 7 जागांसाठी उमेदवार जाहीर केले.
विशेष म्हणजे 11व्या यादीत महाराष्ट्रातील लोकसभा मतदारसंघातील उमेदवारांचा समावेश नाही. साताऱ्यात छत्रपती उदयनराजे भोसले यांना भाजपकडून उमेदवारी मिळण्याची शक्यता दिसत असतानाच रत्नागिरीत नारायण राणे यांच्या संभाव्य उमेदवारीभोवती चर्चा सुरू आहे. मात्र, जोपर्यंत अधिकृत घोषणा होत नाही, तोपर्यंत या जागांबाबतचा सस्पेन्स कायम आहे.
